Ókeypis ljóð og angurværir tónar

Þrír félagar halda á þriðjudag í hringferð í kringum landið á reiðhjólum. Tilgangur ferðarinnar er að vekja athygli á Spes-samtökunum sem styrkja foreldralaus börn í Afríkuríkinu Tógó. Strákarnir, sem heita Gísli Hvanndal Ólafsson, Guðjón Heiðar Valgarðsson og Dagbjartur Ingvarsson, ætla að safna fé fyrir samtökin með ljóðalestri og angurværri rokktónlist en planið er að halda skemmtanir víðsvegar um landið. Ókeypis verður inn á uppákomurnar en gestir eru í staðinn hvattir til þess að láta fé af hendi rakna í söfnunarbauk sem verður með í för.

"Ég hef hjólað mest af okkur en þó ekki farið í lengri ferðir en dagsferðir. Líkamlegt form félaga minna er ekki upp á marga fiska en annar þeirra er með áreynsluastma sem lýsir sér þannig að þegar hann hjólar þá fær hann mikinn verk í lungun og byrjar að hósta en hann verður bara með púst með sér," segir Gísli sem hefur fulla trú á því að þeir nái að klára hringinn á þremur vikum en þeir áætla að ljúka ferðinni um verslunarmannahelgina.

Strákarnir ætla að hjóla 50-150 km á dag og taka þeir tjald með sér en ef veðrið verður þeim ekki hagstætt munu þeir leita húsaskjóls.

"Við viljum hvetja fólk til þess að kynna sér starfsemi félagsins á heimasíðunni spes.is og gerast styrktarforeldrar. Peningarnar sem við söfnum renna beint til félagsins en alltof fáir vita af þessum samtökum." Strákarnir fara suðurleiðina og áætla að vera á Höfn þann 24. júlí, á Kárahnjúkum 28. júlí, á Akureyri 31. júlí og á Blöndósi 3. ágúst svo fáeinir áfangastaðir séu taldir upp.