Syngur dúett með Ellý Vilhjálms

Stórsöngvarinn Ragnar Bjarnason færði Einari Kristni Guðfinnssyni sjávarútvegsráðherra eintak af nýju plötunni sinni, Vel sjóaður, sem kom út á þriðjudaginn var.

Á diskinum er að finna fjórtán sjómannalög "Við ákváðum að gefa út sjómannadisk til að minnast íslenskrar sjómannastéttar. Tímabilið sem við áttum allt okkar undir gömlu bátunum er að líða undir lok og okkur datt í hug að það væri gaman að minnast þess með því að gefa út ekta sjómannaplötu," segir Raggi. "Við stóðum á öxlunum á sjómönnunum um árabil og því vert að minnast þeirra."

Þótt Raggi hafi ekki sjálfur verið á sjó fékk hann smjörþefinn af henni í kringum síldarævintýrin. "Þá áttaði ég mig á því hversu mikilvægur fiskurinn var okkur."

Raggi segist einu sinni hafa hitt gamlan sjómann sem spurði hvort hann væri ekki Raggi Bjarna. "Ég játti því og þá sagðist maðurin vera kominn með leið á mér. Ég spurði af hverju og þá sagði hann mér að hann hafi einu sinni staðið úti á dekki og verið að gera að í vitlausu veðri um hávetur. Slorið var út um allt og það var gamall hátalari festur við mastrið," segir Raggi hlæjandi þegar hann rifjar upp söguna.

"Sjómaðurinn sagði lagið mitt Ship og hoj hafa verið spilað og ég hafi sungið það eins og það væri ekkert mál að vera úti á sjó." Á Vel sjóaður syngur Raggi dúett með Þorvaldi Halldórssyni, Helenu Ólafsdóttur og Ellý Vilhjálms. "Við fengum leyfi til að taka sönginn hennar Ellýar út af lagi sem heitir Sumarauki en er betur þekkt sem Gullfoss með glæstum brag. Þannig gátum við tekið upp dúettinn okkar," útskýrir Raggi. "Það var ótrúlegt augnablik þegar ég heyrði útkomuna."