Tákn kvenleikans

Það er búið að hamra mikið á uppgangi kvenleikans í tískunni um þessar mundir. Meira að segja gallabuxur eru að verða kvenlegri með hærra mitti og Marilyn Monroe vöxturinn, oftar nefndur 90-60-90, fær að njóta sín vel í vetur ef marka má helstu hönnuði heimsins.

Slaufur hafa alltaf verið ákveðið tákn fyrir konur og kvenleika. Ungabörn fá slaufur aðeins nokkurra vikna gömul og er það oft til þess að greina á um kyn barnsins, sem oft er óljóst svona fyrst um sinn. Það eru undantekningarlaust slaufur á stúlknakjólum, og allar stelpur hafa einhvern tímann gengið með slaufur í hárinu. Þó að karlmennirnir sjáist stundum með slaufur um hálsinn komast þeir ekki með tærnar þar sem konurnar hafa hælana.

Núna er hægt að finna slaufur úti um allt, á hálsmenum, kjólum, pilsum, peysum og skóm. Annaðhvort eru þær stórar og áberandi eða bara lítil smáatriði í munstrum. Hægt er að búa til slaufur með einföldum borðum og setja flottan hátískusvip á annars einfalt dress. Einfaldar en fallegar.