Ódæll snýr aftur

Myndlistarmaðurinn Snorri Ásmundsson snýr aftur á heimaslóðir og opnar sýningu á Akureyri á morgun en sýningin er haldin í galleríi Jónasar Viðar í Kaupvangsstræti 12.

Í fréttatilkynningu segir að Snorri hafi oft verið uppnefndur Emil í Kattholti þeirra Akureyringa enda hafi prakkarastrik hans verið mörg. Af þeim sökum hafa Norðlendingar oft hugsað honum þegjandi þörfina. Hann hefur þó fengið uppreisn æru, til dæmis þegar hann var gerður að heiðursborgara Akureyrar árið 2000.

Listferill Snorra hefur einkennst af ítarlegum rannsóknum hans á mannlegu eðli og hafa mannlífstilraunir hans skilað sér inn í sköpunarferli listarinnar. Samkvæmt fréttatilkynningu Snorra hefur hann þróað með sér andlega tækni í málaralist sem hefur vakið sterk áhrif hjá sýningargestum og hafa Orkuflámamyndir hans jafnvel verið taldar hafa lækningamátt.

"Það gleður mig mikið að geta opnað Akureyringum dyr að hinum andlega heimi með því að sýna þeim Orkuflámaverkin. Akureyringar jafnt sem aðrir landsmenn hafa fjarlægst andlegar tengingar, en ég held að fólk sé að vakna til vitundar um að þess efnislega verður ekki notið til fullnustu nema með hinu andlega. Listin er meðal annars verkfæri guðs til að eiga samræður við fólk og við myndlistarmenn berum því mikla ábyrgð," segir Snorri.

Sýningin verður opnuð kl. 16 á morgun og stendur til 30. júlí.