Væri stefnubreyting

Stjórn Landsvirkjunar felldi tillögu Helga Hjörvar og Álfheiðar Ingadóttur í gær um að fara þess á leit við Alcoa Fjarðaál að aflétta trúnaði varðandi verð í orkusölusamningi fyrirtækjanna vegna Kárahnjúkavirkjunar.

Í greinargerð segir að það hafi verið umdeilt að upplýsa ekki um raforkuverð. Færa megi sterk rök fyrir því að almenningur eigi rétt á þessum upplýsingum. Forstjóri Alcoa hafi hins vegar aflétt trúnaði nýlega. Óhjákvæmilegt sé annað en að Landsvirkjun óski þess að leynd verði létt svo að leiðrétta megi umræðuna.

Eftir þetta verður ekki viðunandi að það séu misvísandi upplýsingar um verð. Alcoa hefur komið Landsvirkjun í mjög slæma stöðu. Það er ekki hægt að skilja yfirlýsingu hans öðruvísi en að Landsvirkjun semji um helmingi lægra orkuverð en í Suður-Ameríku. Það væri ekki gott ef satt væri. Því væri langeðlilegast að verðið væri birt til að menn geti sannreynt hvort orkuverðið er gott eða vont, segir Helgi.

Jóhannes Geir Sigurgeirsson, formaður Landsvirkjunar, segir að algjöra stefnubreytingu þurfi til að aflétta trúnaði varðandi orkuverð. Það sé sín persónulega skoðun að halda eigi verðinu leyndu eins og almennt gerist í viðskiptum.