Grunur um tugmilljóna svik

Tryggingastofnun ríkisins hefur kært fyrrverandi þjónustufulltrúa sinn fyrir tugmilljóna króna fjársvik og hugsanlega bótasvik á þessu ári og krafist opinberrar rannsóknar. Fréttablaðið hefur heimildir fyrir því að sterkur grunur leiki á að svikin hafi staðið yfir í fimm til sex ár.

Sérfræðingar stofnunarinnar hafa unnið að öflun gagna og skoðað bókhald ásamt efnahagsbrotadeild Ríkislögreglustjóra. Jón H. B. Snorrason, yfirmaður efnahagsbrotadeildar, segir að nokkrir hafi verið handteknir og einn úrskurðaður í ellefu daga gæsluvarðhald.

Grunur um svik vaknaði við eftirlit innanhúss á miðvikudaginn í síðustu viku. Innra eftirlit Tryggingastofnunar rannsakaði málið og í framhaldi af því var kært á föstudaginn. Efnahagsbrotadeild hefur nú tekið við því og er málið á frumstigi.

Samkvæmt heimildum Fréttablaðsins hefur þjónustufulltrúinn fyrrverandi verið úrskurðaður í gæsluvarðhald. Hún er grunuð um að hafa greitt tugi milljóna inn á bankareikninga sonar síns og félaga hans á Litla-Hrauni.

Karl Steinar Guðnason, forstjóri Tryggingastofnunar, segir að starfsmaðurinn hafi verið látinn fara í byrjun júní út af uppsöfnuðum vanda en þetta sé ekki sá vandi. Aðrir starfsmenn séu ekki grunaðir um þátt í svikunum.

Starfsmönnum var greint frá málinu í gær. Menn eru í áfalli, segir Karl.