Læknir kvað brotið ólíklegt

Karlmaður á fimmtugsaldri var í Héraðsdómi Reykjavíkur á miðvikudag sýknaður af ákæru um að hafa nauðgað dóttur sinni fyrir tæpum tveimur árum, þá tíu ára gamalli.

Stúlkan var í heimsókn hjá föður sínum og gisti ásamt hálf­systur sinni í koju í svefnskála. Faðirinn svaf á dýnu á gólfinu. Stúlkan segist hafa vaknað um nóttina við það að faðir hennar hafi legið ofan á henni og haft við hana samfarir. Þessu harðneitaði faðirinn.

Stúlkan greindi frá atburðinum opinberlega í september í fyrra og í vitnisburði kvensjúkdómalæknis sem rannsakaði hana skömmu síðar kemur fram að afar ólíklegt sé að samræði hafi verið haft við stúlkuna þar sem meyjarhaft hennar hafi verið órofið.

Í dómnum er gagnrýnt að við skýrslutökur yfir stúlkunni hafi hún verið spurð leiðandi spurninga í stað þess að vera látin segja sjálfstætt frá atburðarásinni. Það hafi haft áhrif á niðurstöðuna.

Framburður mannsins var ekki talinn ótrúverðugur og er sitthvað talið rýra trúverðugleika stúlkunnar. Maðurinn var því sýknaður af ákærunni og fallið frá bótakröfu stúlkunnar.