Þróa byltingarkennda aðferð

Samstarfssamningur Háskóla Íslands og Jarðarstofnunar Kólumbíuháskóla um víðtækt samstarf um rannsóknir og kennslu var undirritaður í gær. Með samningnum er verið að formgera samstarf skólanna sem hefur þróast á undanförnum árum. Áhersla verður lögð á verkefni á sviði loftslagsbreytinga.

Eitt þeirra verkefna sem vísindamenn innan vébanda háskólanna hafa unnið að eru rannsóknir á hvort hægt sé að vinna gróðurhúsalofttegundir úr andrúmsloftinu og dæla þeim í fljótandi formi niður í berggrunninn þar sem þær verða að steind vegna efnabreytinga. Talið er að þetta sé tæknilega og efnahagslega mögulegt.

Ólafur Ragnar Grímsson, forseti Íslands, hefur verið vísindamönnunum til fulltingis í þróun verkefnisins. "Jákvæð niðurstaða myndi hafa byltingarkennd áhrif á alla umræðu í veröldinni, efnahagslíf heimsins en umfram allt vistkerfi jarðarinnar og möguleika okkar sem mannkyns. Framlag Íslands, ef vel tekst til, myndi hljóta slíka athygli og styrkja orðspor okkar með þeim hætti að erfitt er að lýsa því með nægilega sterkum orðum."

Ólafur segir að takist tilraunin þá muni það gjörbylta stöðu mannkyns í glímunni við loftlagsbreytingar. Hægt verði að setja upp stöðvar víða og hreinsa andrúmsloft allra jarðarbúa.