Telur upptökin hjá samkeppnisaðila

"Mér fannst ég vera staddur í ríki sem hefði eitthvað annað réttarfar en við," sagði Halldór Guðbjarnarson, forstjóri Visa Ísland um húsleit sem Samkeppniseftirlitið gerði hjá fyrirtækinu í gærmorgun samkvæmt dómsúrskurði.

Var fulltrúum eftir­litsins heimilt að taka öll gögn sem þeim þóknaðist og afrit af tölvugögnum að sögn Halldórs. "Við fáum ekkert að sjá hvað er lagt fram," sagði Halldór og bætti við að sá sem hefði lagt einhverjar upplýsingar fram hefði gert það undir nafnleynd.

Halldór sagði Visa Ísland hafa verið í samkeppni á markaði fyrir kortafærslur frá kaupmönnum við danska fyrirtækið PBS seinustu þrjú árin. "Af því sem að lýtur að lýsingu dómarans þá er svo að sjá að þetta mál eigi einhver upptök úr þeirri átt. Við erum sakaðir um að hafa misnotað markaðsráðandi stöðu okkar á þessum færsluhirðingarmarkaði. Hvernig, hef ég ekki hugmynd um." Halldór segir PBS hafa nokkrum sinnum sent kvartanir og kærur yfir Visa Ísland til Samkeppniseftirlitsins áður. Visa Ísland er ráðandi á þessum markaði með næstum 100 prósenta markaðshlutdeild að sögn Halldórs.

Páll Gunnar Pálsson, forstjóri Samkeppniseftirlitsins, sagði tilefni húsleitarinnar vera rökstuddan grun um brot á samkeppnislögum og þá fyrst og fremst brot á ákvæðum banns við misnotkun á markaðsráðandi stöðu. Að sögn Páls taldi stofnunin óhjákvæmilegt að óska eftir húsleitarheimild til að upplýsa málið. Hann tjáði sig ekki nánar um tildrög.