Þagði um félagana vegna ótta

Maður á þrítugsaldri, Mikael Már Pálsson, var í gær dæmdur í fjögurra ára fangelsi í Héraðsdómi Reykjavíkur fyrir stórfelld fíkniefnabrot og fleiri afbrot. Hann reyndi að smygla inn rúmlega 3,7 kílóum af hreinu amfetamíni og átti aðild að tilraun til smygls á 423 grömmum af kókaíni.

Mikael Már var stöðvaður í Leifsstöð við heimkomu frá Frakklandi í febrúar þegar fíkniefnahundur benti á hann. Í baki ferðatösku hans fundust flatar pakkningar, sem innihéldu rúm 3,7 kíló af amfetamíni. Efnið var greint og reyndist styrkleiki þess á bilinu 98-100 prósent, eða hreint amfetamín í duftformi.

Mikael sagðist við yfirheyrslur hafa gert samning við mann á Íslandi um að hann flytti efnin til Íslands og þá myndu allar skuldir hans, spilaskuldir og fíkniefnaskuldir, verða greiddar upp. Hann vildi ekki segja hver væri eigandi efnanna vegna ótta um eigið líf. Hann játaði sök og sagðist jafnframt ekkert val hafa haft um hvort hann færi eða ekki.

Þá var Mikael Má gefið að sök að hafa fengið tvo unga pilta til að flytja fíkniefni til Íslands frá Amsterdam í Hollandi og falið þeim að útvega einn mann til viðbótar til verksins. Til frádráttar fangelsisvistinni kemur gæsluvarðhald sem Mikael hefur sætt frá 4. febrúar. Hann er nú í geðlyfjameðferð.