Þrýst á endurkomu Tómasar

 Lögmaður Tómasar Zoëga læknis hefur sent forstjóra Landspítalans erindi þar sem óskað er eftir því að haft verði samráð við lækningaforstjóra spítalans um það hvenær Tómas taki aftur við starfi yfirlæknis geðsviðs. Þá er áréttað að hann muni krefjast miskabóta vegna ólögmætisins.

Þetta er gert í framhaldi af dómi Hæstaréttar, sem dæmdi að tilfærsla Tómasar úr starfi yfirlæknis í stöðu sérfræðilæknis hefði verið ólögmæt. Hæstiréttur staðfesti ekki dóm undirréttar sem ógilti þessa ákvörðun yfirstjórnar spítalans.

"Ef lögmaður spítalans talaði í umboði yfirstjórnar spítalans fyrir helgina þá má búast við því að þeir tilkynni að þrátt fyrir ólögmæti ákvörðunarinnar ætli þeir að halda henni til streitu og þar með eru þeir að framkalla milljóna eða tugmilljóna króna skaðabótakröfu sem við hin eigum að borga," segir Karl Axelsson hrl., lögmaður Tómasar. Hann bætir við að Tómas fái miskabætur hvað sem öðru líði, því búið sé að gera ólögmæta hluti gagnvart honum.

"En þær hækka ef á svo að neita að leiðrétta óréttlætið gagnvart honum núna."

Ekki náðist í Magnús Pétursson forstjóra LSH sem staddur er erlendis.