Rýma þurfti íbúðarhús vegna bruna í Keflavík

Slökkviliðsmenn börðust við eld í Hjólbarðaverkstæði í Keflavík í nótt. Rýma þurfti íbúðarhús vegna brunans.

Verulegar skemmdir urðu á Hjólbarðaverkstæðinu og sambyggðri smurstöð við Hafnargötu í Keflavík vegna eldsins sem kom á ellefta tímanum í gærkvöldi. Eldur var mikill í húsinu og lagði reyk yfir bæinn þannig að nærliggjandi götum var lokað og rýma þurfti nokkur hús þar sem reykurinn var mestur tæpum klukkutíma eftir eldsupptök.

Brunavarnir Suðurnesja fengu aðstoð frá slökkviliðinu á Keflavíkurflugvelli og frá slökkviliði höfuðborgarsvæðisins. Slökkvistarfi var lokið um klukkan hálf fjögur í nótt en brunavakt var á staðnum fram á morgun.