Frumvarp um frjálst flæði vinnuafls samþykkt

Frumvarp til laga um breytingar á lögum um frjálsan atvinnu- og búseturétt launafólks innan EES og um atvinnuréttindi útlendinga var samþykkt á Alþingi nú á öðrum tímanum með 46 greiddum atkvæðum. Frumvarpið snýr að réttindum ríkisborgara frá átta af tíu hinna nýju Evrópusambandsríkja. Þeir geta nú komið hingað til lands og ráðið sig í vinnu án atvinnuleyfis frá og með 1. maí. Samþykkja þurfti afbrigði frá þingsköpum til þess að taka málið til annarrar og þriðju umræðu í dag en ljóst var að hraða þurfti málinu þar sem fyrsti maí er á mánudaginn.