Búið að opna í Kerlingarfjöllum

Útivistarsvæðið í Kerlingarfjöllum opnaði formlega nú um helgina þar sem nú er búið að opna fyrir umferð um Kjalveg í báðar áttir og er hann nýheflaður og í góðu standi. Að sögn staðarhaldara hefur umferð til Kerlingarfjalla farið stigvaxandi frá því að skíðaiðkun var þar aflögð árið 2002 og farið að markaðssetja svæðið sem almennt útivistarsvæði yfir sumartímann.

Í Kerlingarfjöllum hefur síðan þá verið unnið ötult starf við merkingu göngustíga en einnig hefur verið útbúið kort með göngulýsingum, þar sem ómerktum leiðum er lýst fyrir þá sem vilja fara út fyrir alfaraleið. Einnig er staðurinn að verða nær fastur viðkomustaður hestamanna sem leggja leið sína þvert yfir Kjalveg, í norður- eða suðurátt.

Staðarhaldari í Kerlingarfjöllum í sumar verður Þóra Fjeldsteð, sagnfræðingur.