Mikilvægur áfangifyrir Háskóla Íslands

Háskóli Íslands og Jarðarstofnun Kólumbíuháskóla gengu í gær formlega til samstarfs um rannsóknir og kennslu. Samkomulagið var undirritað af Kristínu Ingólfsdóttur, rektor Háskóla Íslands, og Jeffrey D. Sachs, forstöðumanni Jarðarstofnunarinnar, og er til næstu fimm ára.

Samkomulagið var undirritað að Ólafi Ragnari Grímssyni, forseta Íslands, viðstöddum. Mest áhersla verður lögð á verkefni á sviði loftslagsbreytinga, sjálfbærrar þróunar og tækni til að bregðast við og draga úr loftslagsbreytingum.

Undirritunin var liður í alþjóðlegu samráðsþingi Jarðarstofnunarinnar um loftslagsbreytingar sem sett var í Reykjavík í gær. Þingið sækja rúmlega 150 stjórnendur fjölþjóðlegra stórfyrirtækja, stofnana og félagasamtaka alls staðar að úr heiminum.

Jeffrey D. Sachs, sem er einn virtasti hagfræðingur heims og ráðgjafi Kofis Annan, aðalritara Sameinuðu þjóðanna, sagði í ávarpi í tengslum við undirritunina að alþjóðastjórnmál væru ekki hentugur vettvangur til að leysa vandamál eins og að draga úr loftslagsbreytingum og þróun tækni til að bregðast við þeim. "Við þurfum að mynda nýtt alþjóðlegt tengslanet háskóla og rannsóknastofnana um heim allan í samstarfi við viðskiptasamfélagið," sagði Sachs. Ekki síst til að koma fram með nýjar hugmyndir, raunhæfar lausnir og meiri skilning á þeim vanda sem við er að glíma í heiminum í dag.

Samstarf háskólanna bæri að skoða sem hluta af hinu alþjóðlega tengslaneti sem verði að koma til ef leysa á þann vanda sem mannkyn stendur frammi fyrir. Sachs telur að Íslendingar hafi mjög margt að bjóða heiminum og þá ekki síst á sviði orkumála.

Aðspurð um mikilvægi samkomulagsins í tengslum við stefnu Háskóla

Íslands í að komast í hóp fremstu menntastofnana heims, segir Kristín Ingólfsdóttir háskólarektor, að samstarfið við Kólumbíu­háskóla sé mikilvægt skref í þeirri sókn. Kristín segir að Kolumbíu­háskóli sé einn albesti háskóli heims og verið sé að formgera fjölbreytt samstarf sem hefur verið til staðar á milli háskólanna í nokkurn tíma. Nú gefist fleiri tækifæri til samstarfs og fjáröflunar til frekari verkefna.