Sala á greiningarlyfjum gæti skapað tekjur innan skamms

Íslensk erfðagreining og bandaríska fyrirtækið Illumina, sem sérhæfir sig í þróun tækja sem notuð er til erfðarannsókna, greindu frá því í dag að þau hafi tekið upp samstarf um að þróa og markaðssetja DNA-greiningarpróf fyrir algenga sjúkdóma.

Áætlað er að fyrstu verkefni þessa samstarfs sé að þróa próf til að greina áhættu einstaklinga á að fá hjartaáfall, sykursýki af gerð 2 og brjóstakrabbamein.

Kári Stefánsson, forstjóri Íslenskrar erfðargreiningar, taldi samninginn geta aukið enn á forskot fyrirtækisins við að nota niðurstöður samvinnunnar til að þróa ný lyf.

Tækni Illumina eigi eftir að auðvelda meingenaleitina og möguleg sala á greiningarprófum gæti skapað tekjur innan tiltölulega skamms tíma.

Í fréttatilkynningu segir Jay Flatley, forstjóri Illumina, að hann reikni með að greiningarpróf sem þróuð verði í samvinnu fyrirtækjanna verði mikilvægur liður í forvörnum og heilsugæslu.