Hundaheppni í Hólminum

Snæfell og Fjölnir áttust við í undanúrslitum Intersportdeildarinnar í körfuknattleik í Stykkishólmi í gærkvöldi. Fríður hópur fólks fylgdi liði sínu úr Grafarvogi til að fylgjast með fyrstu viðureign liðanna í seríunni en þrjá sigurleiki þarf til að komast í úrslitin. Þegar uppi var staðið höfðu heimamenn sigur, 103-101, eftir æspennandi framlengdan leik. Snæfellsliðið mætti mjög einbeitt til leiks og eftir aðeins tvær og hálfa mínútu var staðan orðin 12-2 heimamönnum í vil. Fjölnismenn tóku leikhlé en lítið breyttist eftir það. Snæfellsliðið lék sterka maður-á-mann vörn og hafði Hlynur Bæringsson sérstaklega góðar gætur á Nemanja Sovic. Snæfell, með þá Mike Ames og Calvin Clemmons í broddi fylkingar, hélt uppteknum hætti og valtaði yfir gestina. Ames skoraði 4 af 8 þriggja stiga körfum Snæfells í fjórðungnum og staðan var 41-20 eftir 10 mínútna leik. Fjölnir vaknaði eilítið til lífsins í öðrum fjórðungi og gerðu heimamenn grundvallarmistök, hættu að sækja og fóru frekar í að halda fengnum hlut. Fjölnir mætti leikmönnum Snæfells framar á vellinum og virtist sóknarleikur heimamanna riðlast við það. Góður endasprettur tryggði heimamönnum 16 stiga forystu í hálfleik, 58-42. Stuðningsmenn Snæfells hafa eflaust hugsað með sér að það væri formsatriði að ljúka leiknum en annað kom heldur betur á daginn. Fjölnir skoraði fjórar þriggja stiga körfur á upphafsmínútum síðari hálfleiks og skaut sig inn í leikinn að nýju. Snæfell datt í hnoðgírinn, þar sem menn kusu frekar að fara einn á einn en að láta liðsheildina ráða ríkjum og minnkaði Fjölnir forskotið í 72-70 undir lok fjórðungsins. Snæfell, sem skoraði 41 stig í fyrsta leikhluta, skoraði aðeins 15 stig á þessum kafla. Lokamínútur venjulegs leiktíma voru æsispennandi. Jeb Ivey jafnaði leikinn með þriggja stiga körfu, 93-93, þegar 23 sekúndur voru eftir af leiknum. Ivey braut á Mike Ames, fékk fimmtu villu sína, fjórar sekúndur eftir. Ames klikkaði úr báðum skotunum, Magnús Pálsson tók ævintýralegt skot og litlu munaði að Hjalti Vilhjálmsson næði að blaka boltanum ofan í. Því þurfti að grípa til framlengingar. Bæði Ivey og Nemanja Sovic voru utan vallar í framlengingunni en engu að síður hefði sigurinn getað lent Fjölnismegin. Pálmi Freyr Sigurgeirsson tryggði Snæfelli sigur með einu vítaskoti þegar fjórar sekúndur voru eftir. Hann misnotaði seinna skotið en Hlynur Bæringsson náði frákastinu og leiktíminn rann út. Lokatölur urðu 103-101. "Fyrri hálfleikurinn var eiginlega of hraður en í seinni hálfleik vorum við að taka mikið af þvinguðum skotum. Það eigum við alls ekki að þurfa enda með mjög góðar skyttur innan okkar raða. Við vorum ekki nógu skynsamir í seinni hálfleik. Við eigum að geta verið miklu betri í kollinum en þetta. Menn voru heldur ekki að taka skotin af nógu miklum krafti en sigurinn hafðist og það er fyrir öllu," sagði Bárður Eyþórsson, þjálfari Snæfells. "Við vissum alltaf að við kæmumst inn í þetta. Svona skotsýning endist bara í smá tíma. Ég held að þeir séu að klikka úr einu skoti í fyrsta fjórðungi, voru þá með 8 þrista. Við höfðum alltaf trú á að við kæmum inn í þetta. Hefðu mínir lykilmenn fengið að vera inni á og spila körfubolta hefðum við tekið þetta. Engu að síður var þetta mjög vel dæmdur leikur," sagði Benedikt Guðmundsson, þjálfari Fjölnis.