Schröder boðar kosningar í haust

Gerhard Schröder, kanslari Þýskalands, sagðist í gær vilja að kosningum til Sambandsþingsins yrði flýtt um heilt ár, til komandi hausts, í kjölfar mikils ósigurs jafnaðarmannaflokksins SPD í héraðsþingkosningum í Nordrhein-Westfalen. Flokkurinn hafði haldið um stjórntaumana í þessu fjölmennasta sambandslandi Þýskalands í 39 ár samfleytt er kristilegir demókratar unnu þar afgerandi sigur í gær. Það kom flestum á óvart er Schröder og Franz Müntefering, formaður SPD, tilkynntu eftir að fyrstu tölur gáfu afhroð flokksins til kynna, að þeir myndu leggja það til á flokksstjórnarfundi í dag, mánudag, að kosningum til Sambandsþingsins yrði flýtt og þær látnar fara fram strax í haust. "Þetta er pólitískt sjálfsmorð," sagði einn furðu lostinn flokksmaður sem mættur var á kosningavöku í höfuðstöðvar flokksins í Berlín, eftir því sem greint er frá á fréttavef Der Spiegel. Schröder sagði úrslitin í þessu kjarnavígi SPD þýða að gefa bæri kjósendum í landinu öllu tækifæri til að segja skýrt hverjir þeir vildu að stjórnuðu því. Úrslitin græfu verulega undan því umboði sem hann og ríkisstjórnin hefðu til þess hlutverks og því væri það eina rétta að boða kosningar strax.