Segja þúsund manns hafa farist

Mannréttindasamtök telja að úsbeskir stjórnarhermenn hafi drepið allt að eitt þúsund óbreytta borgara í átökum um helgina. Herinn handtók í gær leiðtoga herskárra múslima sem í fyrradag lýsti yfir íslamskri byltingu í bænum Korasuv. Tvenn mannréttindasamtök, Alþjóðlega Helsinki-stofnunin, sem hefur höfuðstöðvar sínar í Vín í Austurríki, og Mannréttindasamtök Úsbekistans segja að athuganir þeirra bendi til að allt að þúsund manns hafi fallið fyrir hendi stjórnarhermanna í átökum í Andijan og Pakhtabad um helgina og tvö þúsund til viðbótar hafi særst. Ekki er þó um mjög áreiðanlegar rannsóknir að ræða heldur fóru starfsmenn samtakanna hús úr húsi í bæjunum og spurðust fyrir. Úsbesk yfirvöld hafa ekki heimilað sjálfstæða rannsókn á mannfalli um helgina. Hins vegar sögðust erlendir erindrekar sem heimsóttu átakasvæðin í vikunni efast um að eins margir hefðu dáið og stjórnarandstæðingar létu í veðri vaka. Íslömsk bylting Bakhtiyor Rakhimov og fylgismanna hans í bænum Korasuv sem framin var í fyrradag var heldur skammlíf því í gær handtóku öryggissveitir stjórnvalda Rakhimov.