Segja margnota bleiur ekki betri

400 þúsund tonn eru notuð af einnota bleium á ári hverju. Rannsókn breskra umhverfissamtaka hefur þó leitt í ljós að það er ekki endilega umhverfisvænna að nota margnota bleiur. Orkan sem fer í að þvo þær og þurrka auk þvottaefnisins sem fer út í náttúruna gerir það að verkum að samtökin telja það hafa álíka slæm áhrif á umhverfið og einnota bleiurnar. Þau benda þó á að ýmislegt sé hægt að gera til að draga úr mengun. Þeir sem kaupi margnota bleiur eigi að þvo mikið magn í einu, í ekki of heitu vatni og reyna að þurrka þær úti á snúru fremur en í þurrkara. Hvað varðar einnota bleiurnar er spjótum helst beint að framleiðendum og þeir hvattir til að nota endurunnin efni í þær og til að nota rafmagn framleitt með endurnýjanlegri orku.