Leikir gærdagsins í enska

Lið Chelsea, sem hefur verið á mikilli siglingu í ensku úrvalsdeildinni undanfarið, varð að sætta sig við jafntefli á heimavelli við Manchester City í gær. Chelsea menn óðu í færum í leiknum en náðu ekki að nýta sér það og uppskáru aðeins markalaust jafntefli. Í fyrri leik gærdagsins voru það svo liðsmenn Everton sem stálu senunni enn eina ferðina í vetur, þegar þeir björguðu stigi á elleftu stundu á útivelli gegn Southampton. Chelsea-liðið lék án Hollendingsins Arjen Robben sem er meiddur, en hefur verið aðalsprautan í liði þeirra og lykilmaður í velgengni þeirra undanfarið. Það virtist ekki ætla að koma að sök í gær, því Chelsea óð í færum og gerðu sig líklega til að valta yfir andstæðingana. Það átti hinsvegar ekki fyrir þeim að fara að vinna og blanda af óheppni þeirra og frábærri markvörslu David James, markvarðar Manchester-liðsins kom í veg fyrir sigur þeirra. Gestirnir áttu líka hættuleg færi í leiknum og á góðum degi hefðu þeir allt eins getað stolið sigrinum, en þeir náðu ekki að skora frekar en andstæðingarnir. City-menn geta þó vel við unað, enda hafa þeir nú hirt 4 stig af Chelsea í vetur, sem er árangur sem ekkert annað lið getur státað af. Þetta var í fyrsta skipti síðan 9. desember sem lið í úrvalsdeildinni nær að hafa stig af Chelsea-liðinu, en þá gerðu þeir 2-2 jafntefli við meistara Arsenal. Eiður Smári Guðjohnsen lék allann leikinn fyrir Chelsea og náði ekki að skora þrátt fyrir ágæt færi. Á St. Mary´s mættust heimamenn í Southampton og spútniklið Everton í hörkuleik. Það var fyrrum leikmaður Southampton, James Beattie, sem skoraði fyrsta mark leiksins en hann gekk í raðir Everton fyrir 6 milljónir punda fyrir stuttu og var því að spila sinn fyrsta leik á St. Mary´s fyrir annað félag. Hinn leggjalangi Peter Crouch náði að jafna leikinn fyrir hlé og heimamenn komust svo yfir í síðarihálfleik með marki frá Senegalanum Henry Camara. Bæði lið fengu nokkur færi til að skora á síðustu mínútum leiksins, en það var ekki fyrr en komið var fram yfir venjulegan leiktíma að Marcus Bent, framherji Everton, sleit sig lausan og skoraði frábært mark eftir gott einstaklingsframtak. Chelsea er áfram á toppi ensku úrvalsdeildarinnar með 65 stig, 9 stigum á undan Manchester United, sem er í öðru sæti. Everton tryggði stöðu sína í fjórða sætinu með stiginu í dag og hefur hlotið 48 stig. Lið Southampton er í verulegum vandræðum og er í næst neðsta sæti með aðeins 19 stig.