Þrír Svíar létu lífið á Kanaríeyjum

Þrír létu lífið og 22 slösuðust, þar af fimm alvarlega, þegar rúta á vegum sænsku ferðaskrifstofunnar Apollo fór út af vegi og valt á Tenerife, einni af Kanaríeyjunum, í gær. Alls voru 28 ferðamenn í rútunni, allir frá Svíþjóð. Apollo-ferðaskrifstofan hefur nýhafið sölu hér á landi á ferðum til Kanaríeyja. Fram kemur á fréttavef Jyllands-Posten að rútan hafi farið út af veginum skammt frá flugvellinum á eyjunni en fólkið var á leið heim til Svíþjóðar. Að sögn AFP-fréttastofunnar er ekki vitað hvers vegna rútan fór út af veginum en annar bíll virðist hafa tengst slysinu og reyndist ökumaður þess bíls vera ölvaður.