Stórhuga hjá Sterling

Stefan Vilner, framkvæmdastjóri Sterling-flugfélagsins í Danmörku, segist fullviss um að innan tíu ára munu að minnsta kosti helmingur Dana nýta sér þjónustu lággjaldaflugfélaga fremur en annarra. Greinilegt er að innan Sterling eru menn stórhuga því í síðustu viku lýsti Hannes Smárason, forstjóri FL Group sem nú á Sterling, því yfir að þar á bæ hyggðust menn fjórfalda verðmæti félagsins á einu ári.

Sterling er í dag fjórða stærsta lággjaldaflugfélag Evrópu en stefnir að því að verða næst stærsta flugfélag álfunnar. Stefan Vilner er í forsvari fyrir samevrópsk samtök lággjaldaflugfélaga sem vinna að hagsmunum þeirra gagnvart stóru og rótgrónu félögunum.