Mál Norðlingaölduveitu aftur í höndum nefndar um skipulag miðhálendisins

Eins og greint var frá í fréttum NFS í kvöld kaus Sigríður Anna Þórðardóttir að hafna tillögum samvinnunefndar um skipulag miðhálendisins sem fólu í sér um 20% minnkun fyrirhugaðrar Norðlingaölduveitu gegn því að Landsvirkjun fengi í staðinn að virkja á háhitasvæði við hágöngur. Rök ráðherra voru byggð á því að lög sem sett voru í kjölfarið á úrskurði Jóns Kristjánssonar þá setts umhverfisráðherra um Norðlingaölduveitu og kváðu á um að iðnaðarráðherra væri heimilt að veita Landsvirkjun leyfi til að veitunnar samkvæmt úrskurðinum fælu það í sér að ekki væri heimilt að gera breytingar á skipulagi sem fælu í sér breytingar á stærð eða staðsetningu veitunnar. Sigríður Anna segir boltann nú aftur kominn til nefndarinnar sem þó er bundinn af umræddum lögum.

Óskar Bergsson formaður nefndarinnar telur málið nú í hnút. Lögin banni nefndinni að reyna að miðla málum enda andstaða talsverð meðal heimamanna við bakka Þjórsár. Andstaða sem Óskar telur að ekki verði komið til móts við nema með þeim breytingum sem skipulagið kvað á um. Lögunum verði því að breyta. Árni Finnsson, formaður Náttúruverndarsamtaka Íslands, segir sína skoðun vera að málið sé nú á byrjunarreit og því í lófalagið fyrir nefndina að taka veituna í heild út af skipulaginu, en það virðist heimilt. Hann vill sömuleiðis að lögin verði skýrð frekar.