Kettirnir fá glaðning á jólunum í Kattholti

Hátt í 100 kettir eru nú í óskilum í Kattholti. Augljóst er að þeir sakna eigenda sinna enda magir hverjir búnir að vera fjarri heimilum sínum svo vikum og jafnvel mánuðum skiptir. Þeir voru ánægðir með athyglina þegar fréttamann bar að garði í Kattholti.

Þrír hvítir kettlingar dveljast nú í Kattholti ásamt móður sinni en þeir fæddust í Kattholti. Móðir þeirra hefur fengið annað heimili og mun hún flytja norður í land þegar kettlingarnir eru orðnir nógu gamlir til að flytja til nýrra eigenda, það er að segja ef einhver vill taka þá að sér. Hugsuðurinn er einn þeirra katta sem fannst á vergangi og komið var með í Kattholt. Hann þykir sérlega blíður og góður köttur. Hugsuðurinn er sérstakur fyrir margar sakir. Hann er fatlaður en engu að síður duglegur að bjarga sér og lætur fötlun sína ekki aftra sér og er enginn eftirbátur hinna kattanna.

Það er þó gott til þess að vita að það er ekki öllum sama um þessa ólánsketti sem hafa villst að heiman eða verið skildir eftir í ruslagámum. Einhver kattavinur var svo góðhjartaður að senda jólakort með 40.000 krónum nú fyrir jólin og vill Sigríður koma á framfæri sérlegu þakklæti til þessa einstaklings sem það gerði.