6.000 íbúðir byggðar á næstu fimm árum

Varlega áætlað verða 6.000 íbúðir byggðar næstu fimm árin í Reykjavík samkvæmt áætlunum skipulagsyfirvalda. Á næstu mánuðum verða boðnar út lóðir í Úlfarsárdal fyrir um 1.000 íbúðir af öllum stærðum og gerðum, þar sem Þingholtin verða höfð sem fyrirmynd.

Í fyrsta skipti er lang stærstur hluti uppbyggingarinnar á svæðum þar sem unnið er að þéttingu byggðar. Meðal þess er endurnýjun hafnarsvæða, þar sem um 700 íbúðir munu rísa frá Slippasvæðinu í vestri til nýs tónlistar- og ráðstefnuhúss í austri. Hundruðir íbúða eru væntanlegar í kringum Laugaveg og í Skuggahverfi.

Á svæðinu í kringum Hlemm er gert ráð fyrir yfir 1.000 nýjum íbúðum og sömu sögu er að segja af byggingarlandi borgarinnar við Elliðaárvoga og endurskipulagningu sem á að opna fyrir á annað þúsund íbúðir. Vinna við skipulagið er rétt að hefjast en verið getur að svæðið geti borið allt að tvöfalt fleiri íbúðir. Þá er gert ráð fyrir á annað hundrað lóðum fyrir einbýli og sérbýli í grónum hverfum. Á bilinu 20-30% nýrra íbúða í borginni verða í Úlfársdal. Lóðir undir 450 íbúðir verða boðnar út fyrir árslok og annar eins fjöldi í byrjun næsta árs.

Dagur B. Eggertsson, formaður skipulagsráðs, segir að efnt hafi verið til samkeppni um svæðið sem um ræðir og reynt hefði verið að búa til nýja tegund úthverfis fyrir það sem kjósa þann kost. Hann sagði að fyrirkomulagið myndu svipa einna helst til Þingholtanna.

Fastlega má búast við að lóðirnar við Úlfarsfell verði afar eftirsóttar. Þetta eru síðustu Suðurhlíðarnar í borginni, svæði sem ekki er ósvipað Fossvoginum. Dagur segir að gæta verði jafnræðis við úthlutun lóða og til þess væru fleiri en tvær aðferðir. Annars vegar væri um að ræða útboð sem væri meginreglan þar sem hæstbjóðandi myndi hreppa hnossið og hins vegar að draga úr umsóknum. Oftast væri fylgt útboðsreglum en tryggt yrði að fjölskyldufólk og þeir sem ætluðu sér að búa þarna myndu fá lóðir.

Það á ekki að vera langt fyrir íbúa á svæðinu að sækja verslun og þjónustu. En í Stekkjabrekku hefur Byko, Rúmfatalagerinn og Mata tryggt sér lóð undir stórvöruverslanamiðstöð. Gert er ráð fyrir 40-50.000 fermetra húsi, en til samanburðar má nefna að Kringlan er 36.000 fermetrar. Dagur segir að í nýja hverfinu verði rýmisfrekar verslannir sem munu selja vörur á góðu verði.