Segja starfsmenn 2b ólöglega

Vinnumálastofnun segir í áliti sem sent var Verkalýðsfélagi Akraness að starfsemi starfsmannaleigunnar 2b styðjist ekki við lög og því séu starfsmenn á þeirra vegum hér á landi í óleyfi. Sýslumaðurinn í Borgarnesi rannsakar enn kæru á hendur fyrirtækinu en margt bendir til að á pólskum starfsmönnum 2b sé brotið.

Íslensk fyrirtæki sem hyggjast fá hingað til lands til vinnu verkamenn frá löndum utan EES-Svæðisins þurfa að afla hvort tveggja atvinnu- og dvalarleyfa fyrir þá starfsmenn. Þetta er efni yfirlýsingar Vinnumálastofnunar sem send var Verkalýðsfélagi Akraness vegna ágreinings um lögmæti starfsemi 2b, íslenskrar starfsmannaleigu sem stofnunin telur þar með að hafi flutt hingað ólöglega til vinnu þá menn sem hér hafa starfað og styr hefur staðið um.

Verkalýðsfélag Akraness kærði 2b til sýslumannsins í Borgarnesi í byrjun síðustu viku og fór fram á að vinna starfsmanna 2b hjá fyrirtækjunum Ístak og Fagsmíði yrði stöðvuð. Ekkert bólar enn á ákvörðun sýslumanns og lýsa stjórnendur Verkalýðsfélags Akraness furðu á því að ekkert skuli hafa verið aðhafst enda liggi fyrir mat Vinnumálastofnunar á réttmæti starfsmemi 2b og það taki af allan vafa.

Sýslumaðurinn í Borgarnesi, Stefán Skarphéðinsson, segir mál 2b enn í rannsókn.

Forsvarsmenn Verkalýðsfélags Akraness áttu í fyrrakvöld fund með starfsmönnum 2b sem starfað hafa við stækkun Norðuráls. Þegar fundur átti að hefjast kom hins vegar Eiður Eiríkur Baldvinsson, eigandi 2b, á staðinn og fór fram á að sitja fundinn. Því höfnuðu fulltrúar stéttarfélagsins og Pólverjarni einnig með atkvæðagreiðslu. Því varð eigandinn að víkja.

Á fundinum komu fram ýmsar vísibendingar um að pólsku starfsmennirnir hefðu ekki fengið full uppgert þau laun sem 2b bar að greiða þeim og að tveimur starfsmanna hafa ekki verið greitt full laun frá því þeir komu hingað í september auk þess sem þeir hafa enga launaseðla fengið eða séð frá því þeir komu hingað til lands.