Ráðherra spurður um fangaflug í íslenskri lofthelgi

Svo virðist sem bandaríska leyniþjónustan CIA noti Keflavíkurflugvöll oft sem viðkomustað fyrir svonefndar draugaflugvélar sínar, sem sagt er að séu notaðar til að flytja grunaða hryðjuverkamenn til landa þar sem pyntingar eru leyfðar við yfirheyrslur.

Fram er komið í framhaldi af umfjöllun danskra fjölmiðla um fangaflug CIA á tiltekinni vél að sama vél lenti í Keflavík áttunda mars og hafi það verið í þriðja sinn frá ársbyrjun árið 2002 sem hún lendi þar. Eins og fram kom í fréttum Stöðvar 2 í gærkvöldi hefur flugvallarstjórinn í Stavangri í Noregi staðfest að meint CIA-vél, sem kom frá Rúmeníu, hafi haft viðkomu í Stavangri á leið sinni til Keflavíkur fyrr á árinu. Þá greindi Flemming Hansen, samgönguráðherra Dana, frá því í gær að önnur meint CIA-vél en sú sem lenti í Keflavík í mars hafi flogið í gengum danska lofthelgi tíunda október síðastliðinn á leið sinni frá Íslandi til Ungverjalands.

Hér er aðeins um tvær tilteknar flugvélar að ræða en grunur leikur á að CIA hafi umráð yfir mun fleiri vélum, sem allt eins kunna líka að hafa viðkomu hér á landi. Til dæmis lenti hér á Reykjavíkurflugvelli fyrir tæpum mánuði tveggja hreyfla, rúmlega 30 farþega, Casa flugvél, sömu gerðar og með sömu einkennisstafi og The New York Times birti mynd af á sínum tíma á flugvellinum í Prag, þar sem hún er á leið til Afanistana að sækja fanga. Ekki fengust upplýsingar um það hjá Flugmálastjórn fyrir hádegi hvaðan vélin var að koma hingað til lands eða hvert hún var að fara.

Upplýsingar samgögnuráðherra Danmerkur um vélina frá tíunda október hafa orðið til þess að hann hefur verið kallaður fyrir utanríkisnefnd danska þingsins þegar hún fjallar um málið. Tilefnið er að danska utanríkisráðuneytið mótmælti því formlega við bandarísk stjórnvöld í ágúst að flugvélar í áðurnefndum tilgangi flygju um danska lofthelgi en flug síðustu vélarinnar gæti bent til þess að bandarísk stjórnvöld hafi þá málaleitan Dana að engu.

Steingrímur J. Sigfússon, formaður Vinstri grænna, hefur lagt fram fyrirspurn til Geirs Haarde utanríkisráðherra um sama mál og nú er efst á baugi í Danmörku, það er að segja meint fangaflug CIA um íslenska lofthelgi.