Danskir háskólar þeir bestu á Norðurlöndum

Danskir háskólar eru þeir bestu á Norðurlöndum þegar kemur að hugvísindum, félagsvísindum og náttúruvísindum. Þetta sýnir könnun hins virta breska menntatímarits Times Higher Education Supplements, en tímaritið birtir árlega lista yfir 100 bestu háskóla heims.

Greint er frá niðurstöðunum á heimasíðu danska dagblaðsins Politiken. Um 2400 vísindamenn frá 100 löndum tóku þátt í matinu á háskólum um allan heim en vísindamennirnir lögð mat á þeirra eigið fag í öðrum skólum.

Kaupmannahafnarháskóli er átjándi besti háskóli í heimi á sviði hugvísinda og hefur fært sig upp um fimm sæti frá því í fyrra. Háskólar í Finnlandi og Noregi ná aðeins 29. sæti en sænskir háskólar komast ekki einu sinni inn á listann yfir hundrað bestu hugvísindadeildir heims. Samkvæmt listanum er Kaupmannahafnarháskóli með sjöttu bestu hugvísindadeild í Evrópu á eftir Oxford, Cambridge, London School of Economics, SorbonneogLa SapienzaíRóm.

Innan náttúruvísinda standa Árósaháskóli og Kaupmannahafnarháskóli vel, en þeir eru í 47. og 49. sæti yfir háskóla með bestu náttúruvísindadeildirnar. Háskólinn í Uppsölum nær inn á listann og er í 91. sæti.

Á sviði félagsvísinda stendur Kaupmannahafnarháskóli best af norrænum háskólum, en hann er í 50. sæti á lista yfir háskóla með bestu félagsvísindadeildirnar. Viðskiptaháskólinn í Stokkhólmi er í 55. sæti.

Á sviði tækni og lífvísinda standa danskir háskólar ekki jafnvel en Karolinska stofnunin í Svíþjóð er sú fjórða besta í heiminum þegar kemur á lífvísindum. Árósaháskóli er í 68. sæti á listanum og Kaupmannahafnarháskóli er tíu sætum neðar.

Á tæknisviðinu standa Konunglegi tækniháskólinn og Chalmers-tækniháskólinn, sem báðir eru í Svíþjóð, best af norrænum háskólum en Tækniháskóli Danmerkur er í 60. sæti. Ekki er minnst á að Háskóli Íslands eða aðrir háskólar hér á landi hafi náð inn á listana.

Sigurvegarinn á listunum hlýtur þó að teljast hinn bandaríski Harvard-háskóli sem er sá besti í þremur flokkum af fimm, á sviði hugvísinda, félagsvísinda og lífvísinda.