Ekki trygging fyrir því að dragi úr heimilisofbeldi

Nýjar verklagsreglur um meðferð og skráningu heimilisofbeldismála tóku gildi í síðustu viku. Það eitt og sér er þó engin trygging fyrir því að dragi úr heimilisofbeldi að sögn framkvæmdastýru Kvennaathvarfs.

Lengi hefur verið beðið eftir að þessi breyting á reglunum nái í gegn en breytingin er aðallega fólgin í því að hér eftir verður haldið skipulega utan um skráningu heimilisofbeldis. Hingað til hefur það verið undir hælinn lagt að slíkt sé gert að sögn Drífu Snædal, framkvæmdastýru Kvennaathvarfs. Hún segir að ein mikilvægasta breytingin sé sú að fleiri mál verða nú gerð opinber en áður þar sem það sé ekki undir fórnarlömbunum komið hvort kært sé í málum. Hins vegar sé lögð mikil áhersla á að fræðsla fylgi í kjölfarið svo reglurnar nýtist sem best. Drífa segist telja að með reglunum séum við komin nær því að flokka mál af þessu tagi sem almenn glæpamál, sem sé það sem þurfi fyrst og síðast.

Aðspurð hvort hún búist við að þessi breyting verði til þess að stemma stigu við tíðni heimilisofbeldis hér á landi segir Drífa það alveg eiga eftir að koma í ljós. Það fari alveg eftir því hvernig sé unnið úr reglunum hvort þær séu fyrirbyggjandi, t.d. hvernig kynningu og fræðslu fyrir lögreglumenn verði háttað.