Bankarnir greiða 5 milljarða í opinber gjöld

Fyrirtæki í Reykjavík borga tæplega 35 milljarða króna í opinber gjöld á þessu ári. Bankarnir tróna á toppnum með samanlagt um fimm milljarða króna.

KB banki greiðir hæstu gjöld í Reykjavík að undanskilinni Fjársýslu ríkisins en bankinn greiðir í ár tæplega 1,9 milljarða króna í opinber gjöld. Landsbankinn kemur þar næstur á eftir með tæplega 1,8 milljarða króna og Íslandsbanki er fjórða fyrirtækið á listanum með rúmlega 1,3 milljarða króna. Bankarnir tróna því á toppnum en næst kemur Reykjavíkurborg með 1,1 milljarð króna.

Ekki fengust upplýsingar fyrir hádegi um það hversu mikil aukningin er frá fyrra ári en í Reykjanesumdæmi hefur tekjuskattur aukist um rúmlega 70% frá fyrra ári. Þar eru efst á blaði lyfjafyrirtækið Actavis Group hf. sem greiðir 578 milljónir króna og P. Samúelsson hf. með 216 milljónir. Þá kemur Kópavogsbær sem greiðir rúmar 214 milljónir samkvæmt álagningarskránni.