Örninn er allur

Örninn sem var fangaður í Súðarvíkurhlíð síðastliðinn föstudag var aflífaður í gær. Örninn var illa vængbrotinn svo ekki þótti annað hægt en að aflífa hann.

Böðvar Þórisson, líffræðingur hjá Náttúrufstofu Vestfjarða, segir að örninn hefði verið það illa vængbrotinn að ekki var hægt að laga brot hans. Hefði brotið ekki verið eins alvarlegt hefði örninn verðið sendur til Reykjavíkur í röntgenmyndatöku og hægt hefði verið að laga brot hans. Böðvar telur að örninn hafi ekki líklega ekki verið lengi brotinn en blætt hafi úr sárinu þegar hann fannst. Örninn, sem er elsti merkti örn sem hefur fundist á Íslandi eða 18 ára gamall, verður sendur til Náttúrufræðistofnun Íslands í Reykjavík, þar sem hann verður rannsakaður og tekið verður úr honum blóðsýni til erfðarannsókna.