Hættir tilraunum til að opna þjóðveginn

Veður hefur versnað á ný í Húnavatnssýslum og eru vegagerðarmenn hættir tilraunum sínum til að opna þjóðveg eitt á norðurleiðinni á milli Laugabakka og Víðihlíðar. Langflestir þeirra rúmlega hundrað, sem björgunarsveitarmenn björguðu úr föstum bílum í gærkvöldi og nótt, eru enn strandaglópar í þéttbýliskjörnum á leiðinni. Nú fyrilr stundu var lögreglan á Blönduósi að kalla út björgunarsveit til að aðstoða fólk í föstum bílum sem anað hafði út í ófæruna í morgun. Ekkert amar að fólkinu en lögreglan varar fólk við að reyna að fara þarna um því það er kolófært vegna snjóa og blindu. Vegagerðarmenn bíða nú átekta og er áætlað að björgunarsveitarmenn verði þeim innanhandar við að losa bílana, sem eru fastir um allan veg síðan í gærkvöldi.