Tappa þarf af undirliggjandi verðbólgu

Dreifing veiðiréttar í sjávarútvegi er miklu meiri heldur en svarar dreifingu eignaraðildar í langflestum stóru atvinnuvegum okkar. Einnig þarf að tappa af undirliggjandi verðbólgu með gjaldeyriskaupum. Þetta sagði Einar K. Guðfinnsson sjávarútvegsráðherra í setningarræðu sinni á aðalfundi Landsambans íslenskra útvegsmanna nú eftir hádegið. Einar sagði í ræðu sinni að það væri furðulegt að menn héldu áfram að tala um vá af samþjöppun í sjávarútvegi en ljái um leið ekki máls á því að setja skorður við eignarhaldi á því sem hann kallaði viðkvæmasta svið lýðræðis okkar, fjölmiðlamarkaðinum þar sem eitt skýrasta dæmið sé um samþjappað eignarhald. Samkvæmt tölum sem Einar greindi frá í ræðu sinni eru alls 950 aðilar í landinu sem fást við útgerð, þar af eru 292 einstaklingsútgerðir og 658 félög. Til að renna svo stoðum undir þann málflutning sinn að lítil samþjöppun sé í sjávarútvegi sagði Einar að stærsta sjávarútvegsfyrirtæki landsins væri einungis í sautjánda sæti yfir veltumestu fyrirtæki landsins. Einar sagði mesta vandann sem steðjaði því að sjávarútvegi í landinu ekki vera samþjöppun heldur hágengi krónunnar, sem undanfarið hafi gengið ansi nærri útflutnings- og samkeppnisgreinum á borð við sjávarútveginn. Björgólfur Jóhannsson formaður LÍÚ sagði í ræðu sinni á fundinum að hann teldi mikilvægt að viðurkenna þá staðreynd að undirliggjandi verðbólga stafar að mestu leyti af heimtilbúnum ástæðum. Undirliggjandi verðubólgu yrði einfaldlega að tappa af. Mikilvægt væri að ákvörðun yrði tekin nú þegar um aukin kaup á gjaldeyri og ætti að nota til þess allt söluandvirði Símans, og meira til. Sjávarútvegsráðherra tók undir með Björgólfi í ræðu sinni.