Nýr endurvarpi á Hornströndum

Nýr endurvarpi fyrir talstöðvarbúnað björgunarsveita var settur upp í friðlandi Hornstranda á Vestfjörðum í fyrradag. Það gekk ekki þrautalaust fyrir sig en þyrlu þurfti til verksins.

Staðið hafði til að setja endurvarpann upp á Fannalágarfjalli á Hornströndum í nokkrar vikur en veður hefur hamlað för, eftir því sem fram kemur á vef Bæjarins besta. Landhelgisgæsla sá um verkefnið með aðstoð fjögurra björgunarsveita á Vestfjörðum en þannig hefur hist á að þegar þyrla hefur verið laus til verksins hefur veður ekki verið ákjósanlegt. Að sögn Eggerts Stefánssonar hjá Björgunarfélagi Ísafjarðar gekk verkið sæmilega vel á sunnudaginn en auk nýja endurvarpans sem settur var upp var skipt um gamlan endurvarpa á Snæfjalli.

Nýja endurvarpanum er ætlað að bæta fjarskipti við víkurnar í friðlandi Hornstranda, Aðalvík, Fljótavík og jafnvel Hornvík, en eftir á að gera athuganir á því nákvæmlega hversu langt sambandið nær.

Þegar lokið hafði verið við uppsetningu endurvarpanna tveggja stóð til að taka þann gamla á Snæfjalli niður og flytja hann til byggða, en þá þurfti þyrla Landhelgisgæslunnar að sinna útkalli á Faxaflóa. Gamli endurvarpinn var því skilinn eftir ásamt þeim mannsskap sem var fjallinu. Það kom þó ekki að sök að sögn Eggerts þar sem blíðviðri var á svæðinu og hópurinn gekk því einfaldlega niður á Sandeyri þar sem björgunarbáturinn Gunnar Friðriksson sótti mannskapinn stuttu síðar.