Örmögnuðust á fjalli

Að sögn Guðjón Sigurðssonar, formanns björgunarsveitarinnar Ísólfs, var tíu manna hópur fólks á göngu um Vestdal í nágrenni Seyðisfjarðar þegar tveir úr hópnum duttu í á. Fólkið blotnaði og var orðið kalt þegar ákveðið var að hringja á björgunarsveitina sem fór upp í dalinn á bíl og náði að koma fólkinu til byggða án þess að skaði hlytist af volkinu. Guðjón segir Ísólfsmenn áður hafa farið í svipaðan leiðangur til að ná í fólk sem hafi örmagnast eftir að hafa misstigið sig eða vegna kulda og vosbúðar. Gönguleiðin um Vestdal liggur yfir á, en það er einmitt hún sem hefur reynst göngufólki þrándur í götu á ferð um Vestdalinn sem er vinsæl gönguleið.