Tilbúinn að endurskoða kvótakerfið

Guðni Ágústsson landbúnaðarráðherra segir að ekki komi til greina að flytja inn fósturvísa til þess að blanda við íslenska kúakynið. Hann vill hins vegar skoða hvort lyfta eigi þaki af mjólkurkvótanum til þess að mæta auknum þörfum markaðarins. Bændur í Borgarfirði hafa skorað á Landssamband íslenskra kúabænda að huga nú þegar að undirbúningi á innflutningi erfðaefnis, til blöndunar við íslenska kúastofninn. Þeir benda á að núverandi framleiðsla nægi ekki, til að mæta þörfum markaðarins og að vísbendingar séu um að íslenska kúakynið hafi ekki burði til að fullnægja hinni auknu eftirspurn til langframa. Landbúnaðarráðherra segir það ekki á dagskrá að flytja inn nýtt kúakyn. Hann minnir á að tekist hafi verið á um málið fyrir nokkrum árum. Guðni Ágústsson, landbúnaðarráðherra, sagði að Íslendingar vildu standa að sínu kúakyni og trúa á sína mjólk, þeim þyki hún bæði bragðbetri og haldna eiginleikum og sé t.d. vörn gegn sykursýki. Honum finnst því ekkert vit í því að fara að deila enn og aftur um þetta atriði og nær væri að fjölga bæði kúm og bændum.