Sýknuð af smygli í London

Sautján ára íslensk stúlka sem ákærð var fyrir smygl á kókaíni í Bretlandi var sýknuð í dag . Hún hélt því fram fyrir dómi að hún hefði verið burðardýr án sinnar vitundar en hún var aðeins sextán ára þegar hún var handtekin. Stúlkan kom fyrir dómara í Inner London Crown Court klukkan tíu á staðartíma í morgun. Hún hélt því fram fyrir dómi að hún hefði verið burðardýr og haldið að hún væri að flytja peninga. Stúlkan grét við dómsuppkvaðningu þegar henni var ljóst að hún yrði látin laus. Hún var ákærð fyrir að flytja inn 250 grömm af kókaíni. Hún var handtekin á Waterloo lestarstöðinni í Bretlandi við komuna frá Amsterdam. Stúlkan segir að skoskur vinur vinar hennar, með slöngulokka eða svo kallaða dreadlocks, hafi átt hugmyndina af ferð hennar til Hollands, en þangað átti hún að fara, sækja peninga og fá tíu þúsund krónur fyrir greiðann. Hún segir annan mann að nafni John hafi greitt fyrir ferðina og séð um að sækja hana á flugvöllinn í Amsterdam. Hann hafi keypt handa henni skó og troðið peningum í skósólann til að koma í veg fyrir að hún yrði rænd. Stúlkan neitaði því staðfastlega að hafa vitað að ekki væru peningar í skósólanum heldur kókaín. Andvirði efnisins er talið hafa verið rúmlega ein komma þrjár milljónir íslenskra króna.