Hlutfallslega mesti vaskurinn hér

Hvergi meðal ríkja innan Efnahags- og framfarastofnunarinnar OECD er hlutfall virðisaukaskatts af þjóðarframleiðslu hærra en á Íslandi. Hlutfall virðisaukaskatts af skatttekjum ríkissjóðs á Íslandi er jafnframt þriðja hæsta í löndum innan OECD. Aðeins í Mexíkó og Tyrklandi er hlutfallið hærra. Þetta kemur fram í nýrri skýrslu frá OECD. Hlutfall virðisaukaskatts af þjóðarframleiðslu á Íslandi er 16,3 prósent en til samanburðar er hlutfallið á hinum Norðurlöndunum á bilinu 13,3 í Svíþjóð til 16 í Danmörku. Skattur af þjónustu og matvöru er samkvæmt skýrslunni um 41 prósent af skatttekjum ríkissjóðs Íslands, eða þriðja hæsta. Hlutfallið er hæst í Mexíkó, um 53 prósent. Hlutfall skatttekna sem hlutfall af þjóðarframleiðslu á Íslandi jókst jafnframt mest allra ríkja OCED á milli áranna 2003 og 2004, eða um 2,1 prósentustig. Aðeins í tveimur öðrum ríkjum jókst hlutfallið um meira en eitt prósentustig, eða í Noregi um 1,5 prósentustig og 1,3 prósentustig í Danmörku. Ef horft er til áranna 1995 til 2003 jókst hlutfall skatttekna af þjóðarframleiðslu næstmest á Íslandi, eða um tæp 8 prósentustig. Aðeins í Tyrklandi jókst hlutfallið meir. Þá er skattur á fyrirtæki sem hlutfall af skatttekjum næstlægstur á Íslandi, eða 3,9 prósent. Hlutfallið er lægst í Þýskalandi þar sem það er 3,4 prósent af skatttekjum. Hæst er hlutfallið í Noregi og Lúxembúrg, eða 19 prósent. Fram kemur að hlutfall skatttekna sem rennur til ríkissjóðs miðað við hlutfall sem rennur til að mynda til sveitarstjórna, er einungis hærra en á Íslandi í fimm löndum innan OECD. Hlutfallið á Íslandi árið 2003 var um 75 prósent til ríkissjóðs á móti 25 prósentum til sveitarstjórna, samkvæmt skýrslunni. Ísland er í tíunda sæti þegar horft er til hlutfalls skatttekna af þjóðarframleiðslu og eru öll hin Norðurlöndin þar ofar á lista. Árni Mathiesen fjármálaráðherra vildi ekki tjá sig um skýrsluna þar sem hann hafði ekki kynnt sér hana.