Átta sækjast eftir fyrsta sætinu

Átta sækjast eftir fyrsta sæti á lista Framsóknarflokksins í Kópavogi fyrir sveitarstjórnarkosningarnar sem fram fara í vor. Alls eru fjórtán í framboði, fjórar konur og tíu karlmenn. Kosið verður um sex efstu sætin á 22 manna lista til sveitarstjórnarkosninga í opnu prófkjöri. Tekið verður mið af jafnréttisákvæðum í lögum Framsóknarflokksins og verða því þrír af hvoru kyni í sex efstu sætunum, þeir þrír karlar sem fá flest atkvæði og þær þrjár konur sem fá flest atkvæði. Samkvæmt heimildum Fréttablaðsins er talið að baráttan um fyrsta sætið standi einna helst milli Ómars Stefánssonar bæjarfulltrúa og Unu Maríu Óskarsdóttur, uppeldis- og menntunarfræðings. Ómar er eini starfandi bæjarfulltrúinn á listanum og er það talið vera honum til tekna en bent var á Unu Maríu til stuðnings að hún hefði starfað að bæjarmálum undanfarin tvö kjörtímabil. Ómar og Una María eiga þó sína andstæðinga, sem vildu jafnvel heldur sjá Lindu Bentsdóttur í forystusætinu. Bent er á að Ómar hafi misst traust margra flokksmanna þegar hann úthlutaði vinum og fjölskyldu lóðum í lóðaúthlutuninni í Vatnsenda í Kópavogi sem styr stóð um. Una María er jafnframt nokkuð umdeild meðal flokksmanna. Þá eru þau sögð tilheyra hvort sinni fylkingunni í baráttu sem staðið hefur um yfirráð yfir framsóknarfélögum í Kópavogi og endurspeglaðist meðal annars í Freyjumálinu svokallaða. Ómar heyri til fylkingar sem kennd hefur verið við bræðurna Pál og Árna Magnússyni en Una María sé hluti af fylkingu sem kennd er við Siv Friðleifsdóttur. Þá er Andrés Pétursson, sem sækist eftir öðru sæti, talinn líklegur til að ná kjöri í eitt af efstu sætunum og jafnframt er Samúel Örn Erlingsson sagður til alls líklegur. Þó svo að Samúel hafi ekki starfað áður í Framsóknarflokknum er hann vafalaust þekktasta nafnið á listanum, en einnig eru eiginkona hans og dóttir miklir og þekktir Breiðabliksmenn, sem ekki þykir spilla fyrir í prófkjörum í Kópavogi. Fréttablaðið hafði samband við allflesta frambjóðendurna í gær sem voru sammála um að framundan væri spennandi og skemmtileg kosningabarátta.