Borgvardt bestur

Daninn Allan Borgvardt fór hreinlega á kostum með FH í sumar. Skoraði 13 mörk í 15 leikjum og lagði upp 6 önnur. Hann fiskaði þar að auki víti sem skilaði marki. Frábært sumar og viðeigandi endir á glæstum ferli hans hjá FH. Fréttablaðið valdi hann enda leikmann sumarsins í Landsbankadeild karla Rétt á eftir Allan í einkunnagjöf Fréttablaðsins komu félagar hans í FH, Auðun Helgason og Tryggvi Guðmundsson, og fjórði FH-ingurinn, Guðmundur Sævarsson, er svo í fimmta sæti. Fréttablaðið heyrði í þjálfara FH, Ólafi Jóhannessyni, og bað hann um gefa álit sitt á þessum lærisveinum sínum. "Allir þessir strákar áttu frábært sumar með FH. Allan var besti framherji landsins í sumar og ég hef margoft sagt að hann sé frábær fótboltamaður. Hann er þar að auki einstaklega góður félagi og féll mjög vel inn í okkar hóp. Hann er kærulaus og þægileg týpa. Lífið er ekki flókið hjá honum og það er heldur enginn hroki í honum," sagði Ólafur, sem þarf að fylla skarð Allans í vetur enda er hann farinn til Noregs. Þeir Auðun og Tryggvi komu báðir úr atvinnumennsku fyrir tímabilið og mörgum knattspyrnumanninum hefur reynst það þrautin þyngri að spila á ný hér á landi eftir að hafa verið í atvinnumennsku til margra ára. Það vandamál glímdu Auðun og Tryggvi ekki við enda með hausinn á réttum stað. "Margir þessara atvinnumanna hafa komið heim til að deyja og fyrsta árið er oft erfitt. Þess vegna ræddi ég þetta við strákana fyrir mótið og gerði þeim grein fyrir þessu. Þeir fóru báðir beint í vinnu og héldu sér á jörðinni. Voru með rétt hugarfar og þess vegna tókst þeim svona vel upp í sumar. Auðun er mikill leiðtogi og Tryggvi er frábær knattspyrnumaður og stórskemmtilegur fýr. Ég vil meina að þetta sé besta endurkoma atvinnumanna í íslenska boltann á ný. Báðir komust þeir líka í landsliðið, sem segir ýmislegt," sagði Ólafur Jóhannesson, þjálfari FH.