FH efst hjá Fréttablaðinu

Fréttablaðið var með einkunnagjöf í fyrsta sinn í sumar og var öllum leikmönnum leikjanna 90 gefin einkunn á bilinu 1 til 10. Yfirburðir FH-inga á Íslandsmótinu kristölluðust einnig í einkunnagjöf blaðsins en það voru hins vegar Fylkir og Þróttur sem léku betur en árangur liðanna gaf til um ef marka má frammistöðumat Fréttablaðsins. FH-ingar léku liða best í júní (6,66) og ágúst (6,30) auk þess að vera í öðru sæti bæði í maí (6,19) og júlí (6,13). Þeir slökuðu á í lok mótsins og voru aðeins í 5. sæti í lokaumferðum mótsins. FH-liðið lék líka liða best bæði á heimavelli (6,20) sem og útivelli (6,41) og sömu sögu var að segja þegar skoðuð er spilamennska liðanna eftir fyrri (6,45) eða seinni umferð (6,16). Valsmenn voru í 2. sæti á bæði heima- og útivelli líkt og í fyrri umferðnni en góð spilamennska Skagamanna seinni hluta sumarsins kom þeim í 2. sætið yfir bestu frammistöðu leikmanna liða í seinni umferð.Valsmenn byrjuðu mótið af feiknakrafti og léku best samvkæmt einkunnagjöfinni í bæði maí (6,56) og júlí (6,32) auk þess að vera í öðru sætinu á eftir FH-ingum í júnímánuði. Þeir gáfu hins vegar mikið eftir og fengu fæst stig allra liða í deildinni síðustu fimm vikur Íslandsmótsins. Þróttarar áttu ekki að falla ef marka má frammistöðumat íþróttafréttamanna Fréttablaðsins en samkvæmt einkunnagjöfunni voru Þróttarar í 7. sætinu en ekki því síðasta. Þar sitja hins vegar Eyjamenn sem björguðu sér frá falli á markatölu en stóðu sig verst allra liðanna tíu samkvæmt einkunnagjöf Fréttablaðsins.Eyjamenn voru upp og niður í sumar. Þeir voru langlélegasta liðið í maí (4,70) samkvæmt einkunnagjöfunni en voru hins vegar komnir upp í 2. sætið í ágústmánuði en stigin sjö sem Eyjamenn nældu sér í næstsíðasta mánuði tímabilsins áttu mestan þátt í því að liðið bjargaði sér frá falli.