Léttir að losna frá Keflavík

Írski Varnarmaðurinn Brian O Callaghan sem lék með Landsbankadeldarliði Keflavíkur segir þunga byrði af sér létt eftir að hann fékk sig loks lausan frá Suðurnesjaliðinu. Callaghan skrifaði á föstudag undir samning við Notts County sem Guðjón Þórðarson stýrir, eftir að Keflavík hafði dregið að leysa hann undan samningi eins og hann hafði farið fram á. "Þeir ætluðu að halda mér fram í október. Það hefði þýtt að ég mætti ekki skipta um lið fyrr en í janúar miðað við reglur félagaskiptagluggans. Þetta hefur tekið rúmar 2 vikur og verið virkilega streituvaldandi af því að þetta var tækifærið mitt að komast aftur í deildakeppnina hérna. Þetta var gríðarlegur léttir og ég þurfti á þessu að halda." sagði Callaghan í viðtali við Nottingham Evening Post. O Callaghan hafði fyrir miðjan júlí skrifað undir samning við Guðjón Þórðarson hjá Notts County þrátt fyrir að vera samningsbundinn hjá Suðurnesjaliðinu. Hann lék um leið einn æfingaleik með Notts County þrátt fyrir þetta. Hann lék 4 leiki með Keflvíkingum í upphafi móts en hætti óvænt. Rúnar Arnarson, formaður knattspyrnudeildar Keflavíkur, sagði í viðtali við Fréttablaðið þann 15. júlí sl. ekki koma til greina að leyfa Brian að fara án greiðslu til Notts County. "Brian er með samning við Keflavík til 16. október og ef ekki berst neitt tilboð í hann fyrir þann tíma þá ætlum við ekki að leyfa honum að fara." Guðjón Þórðarson, sem var við stjórnvölinn hjá Keflavík í vetur, sagði við það tilefni að það væri undarlegt að Brian mætti ekki fá að fara. "Brian er ekki að æfa hjá Keflavík. Hann fær engin laun og er auðvitað ekkert að spila með félaginu. Hann býr hér á Englandi og kemur til Notts County ef hann fær leyfi til þess að hafa félagsskipti úr Keflavík. En það er greinilegt að forráðamenn Keflvíkur vilja ekki að hann fari til Notts County." Félögin virðast engu að síður hafa náð samkomulagi en ekki ekki er vitað hvort Keflavík fékk greiðslu fyrir að leysa leikmanninn undan samningi. Ekki náðist í Rúnar Arnarson, formann knattspyrnudeildar Keflavíkur í kvöld til að fá upplýsingar um það.