Nýr kynsjúkdómur greinist í Evrópu

Nýr kynsjúkdómur er farinn að skjóta upp kollinum á hinum norðurlöndunum og í öðrum löndum Evrópu. Þessi kynsjúkdómur, sem gengur undir skammstöfuninni LGV, hefur verið landlægur í Asíu, Afríku, Mið- og Suður-Ameríku og er nú farinn að verða meira áberandi í Frakklandi, Hollandi, Sviss og Englandi. LGV er ein tegund af klamydíu og er einnig farinn að greinast á hinum norðurlöndunum en hefur enn ekki greinst hér á landi, að sögn Þórólfs Guðnasonar, yfirlæknis hjá embætti Sóttvarnalæknis, en Íslendingar þurfa að vera vel vakandi fyrir þessum sjúkdómi. Þórólfur sagði í Hádegisútvarpi Talstöðvarinnar í gær að sjúkdómurinn gæti verið slæmur. Hann væri oft einkennalítill til að byrja með því að sjúklingar tækju ekki oft fyrstu einkennum sem væru sár á kynfærum. "Síðan getur sýkingin breiðst út og valdið sárum og alvarlegum sýkingum. Klamydía svarar vel réttri lyfjameðferð þannig að þetta er hægt að lækna ef það greinist á góðum tíma," sagði hann.