VG óánægðir með afskipti Össurar

Oddviti Vinstri Grænna í borgarstjórn er lítt hrifinn af afskiptum Össurar Skarphéðinssonar af málefnum R-listans. Össur segir að Samfylkingin eigi að bjóða fram R-lista, hvort sem er með þátttöku hinna flokkanna eða ekki. Össur skrifaði grein um helgina á heimasíðu sína þar sem hann segir að Samfylkingin geti hvenær sem er gengið ein til kosninga í borginni, án samstarfs við Vinstri Græna og Framsóknarflokksins, og náð fimm kjörnum fulltrúum. Þessi skrif Össurar hafa valdið miklum titringi innan R-listans og telja margir hann vera að ögra samstarfinu. Árni Þór Sigurðsson er oddviti Vinstri Grænna í R-listanum og hann segir þetta heimskulegt þar sem Össur ætti að vita að það verður ekki til nein Reykjavíkurlisti nema sömu aðilar og stóðu að honum í síðustu kosningum sameinist einnig í næstu kosningum. Aðspurður um hvort honum finnist líklegt að Samfylkingin bjóði ein fram saði Árni að skilaboðin úr röðum þeirra væru misvísandi og benti á mikilvægi þess að þeir færu að gera upp hug sinn og hugi að afstöðu sinni til málsins. Hann segir einnig framboðsmálin vera í ákveðnum farvegi og að samningafólk þeirra sé með umboð til að ræða málin sín á milli og honum finnst ekki heppilegt að gera mikið úr ummælum einstakra þingmanna eins og Össurar. Árni taldi ummæli Össurar ekki skaða samstarfið en geti þó haft áhrif á viðræðurnar sem nú standa yfir. Alfreð Þorsteinsson forseti Borgarstjórnar og oddviti framsóknarmanna í R-listanum vildi ekkert tjá sig um málið í samtali við Fréttastofu.