Draumur að spila með aðalliðinu

Bjarni Þór Viðarsson, knattspyrnumaðurinn ungi, lék sinn fyrsta leik með aðalliði enska liðsins Everton á miðvikudagskvöld þegar hann kom inn sem varamaður í æfingaleik gegn skoska liðinu Dundee United. Þetta var fyrsti leikur liðsins á undirbúningstímabilinu og var þeirra sterkasta liði stillt upp með menn eins og Nigel Martyn, Simon Davies, James Beattie og Duncan Ferguson innanborðs. Everton vann leikinn 1-0. Bjarni Þór er á sautjánda ári og kom inn sem varamaður á miðjuna fyrir Li Tie þegar tíu mínútur voru eftir og stóð sig vel. "Ég fékk boltann alveg nokkrum sinnum þessar tíu mínútur og gerði þetta bara einfalt. Þetta var góð reynsla og mjög gaman." sagði Bjarni Þór sem vonast eftir því að fá meira að spreyta sig með aðalliðinu á undirbúningstímabilinu. "Það er alveg möguleiki á því að maður fái að mæta á einhverjar æfingar og svona en það kemur bara allt í ljós. Það væri náttúrulega algjör draumur ef maður fær það. Félagið hefur ekki keypt marga leikmenn í sumar þannig að ég geri mér alveg vonir um það." sagði Bjarni Þór. Spennandi vetur er framundan hjá félaginu en liðið vann sér inn sæti í Meistaradeildinni síðasta tímabil. Bjarni var í fríi hér á landi en síðan hann kom út aftur hefur hann verið á stanslausum æfingum. "Það er svo heitt hérna núna, um 30 stiga hiti, þannig að það gerir manni ekki auðveldara fyrir. Við æfum alltaf þegar mesti hitinn er. Þetta er sérstaklega erfitt í hlaupunum og sprettunum en maður hefur þetta af." sagði Bjarni sem setur stefnuna á að spila sem mest með varaliðinu á komandi tímabili og standa sig þar. "Ef ég stend mig þar þá er aldrei að vita hvað gerist."