Þórður sýnir ÍA mikinn drengskap

Þórður Þórðarson, markvörður Landsbankadeildarliðs ÍA í knattspyrnu hefur farið fram á að samningi sínum við félagið verði rift. Þykir Þórður sýna mikinn drengskap gagnvart félaginu með þessari ákvörðun sinni en hann þurfti skyndilega að hætta knattspyrnuiðkun upp úr miðjum maí sl. vegna alvarlegra veikinda. Þórður hafði í nóvember sl. gert 2 ára samning við knattspyrnudeild ÍA en í KSÍ samningum milli félaga og leikmanna segir að leikmenn séu einungs tryggðir gegn meiðslum en ekki veikindum. Því hefði félagið orðið að standa við 2ja ára samninginn við Þórð sem með þessu afsalar sér launagreiðslum frá félaginu. Eiríkur Guðmundsson, formaður rekstrarfélags meistara- og 2. flokks karla hjá ÍA segir í fréttatilkynningu sem hann hefur sent út að ekki hafi staðið til annað en að efna samninginn við Þórð og þakkar markverðinum um leið fyrir íþróttamennskuna. Síðan Þórður hætti knattspyrnuiðkun hefur hann verið að þjálfa markmenn liðsins og er félagið í viðræðum við Þórð um að hann taki markmannsþjálfun allra flokka félagsins að sér. Þórður spilaði alla leiki liðsins sl. sumar og var valinn besti leikmaður liðsins. Hann er 32 ára og uppalinn Skagamaður, spilaði á Skaganum allt til ársins 1999 er hann hélt til Svíþjóðar og spilaði með Norrköpping. Tveim árum síðar kom hann aftur heim og spilaði eitt tímabil með Val og eitt með KA áður en hann snéri aftur á Skagann.