Upson vill fara til Liverpool

Varnarmaðurinn Matthew Upson hjá Birmingham hefur viðurkennt að hann renni hýru auga til Liverpool og telur að þar sé lykillinn að því að næla sér í landsliðssæti fyrir heimsmeistaramótið á næsta ári. Rafael Benitez er sagður vera að undirbúa fimm milljón punda tilboð í varnarmanninn, en hann er að leita að eftirmanni Sami Hyypia í vörninni og hefur þegar lýst yfir áhuga sínum á Upson, sem áður lék með Arsenal. Steve Bruce, knattspyrnustjóri Birmingham er ekki hrifinn af þessum fyrirætlunum þess spænska. "Við viljum halda í okkar bestu leikmenn og byggja í kring um þá. Upson veit að hann er einn af þeim og því vona ég að hann vilji ekki fara frá okkur, enda á hann þrjú ár eftir af samningi sínum við Birmingham," sagði Bruce.