Álfukeppnin að hefjast

Álfukeppnin í knattspyrnu hefst á morgun í Þýskalandi en þar keppa átta þjóðir um Álfumeistaratitilinn. Þetta er sjötta Álfukeppnin sem haldin er. Frakkar eru núverandi meistarar en þeir eru ekki með að þessu sinni. Þjóðverjar leggja mikinn metnað í keppnina enda er hún eins konar forsýning fyrir heimsmeistaramótið í Þýskalandi á næsta ári. Keppt er í tveimur riðlum. Í a-riðli leika Þýskaland, Argentína, Ástralía og Túnis og í b-riðli spila Brasilía, Mexíkó, Grikkland og Japan. Landsliðin mæta með sína sterkustu leikmenn. Tólf leikir verða á Sýn og Sýn 2. Argentína og Ástralía mætast í beinni útsendingu á Sýn á morgun og hefst leikurinn klukkan 16. Á fimmtudag mætast heimsmeistarar Brasilíu og Evrópumeistarar Grikkja og sá leikur verður beint á Sýn klukkan 18.30.