Fljótum sofandi að feigðarósi

Að mati leiðandi vísindamanna er fuglaflensan komin á fremsta hlunn með að verða að heimsfaraldri og verði ekki gripið til markvissra aðgerða er voðinn vís. Kínverjar segjast hafa þróað nýtt bóluefni fyrir fugla og menn en Alþjóðaheilbrigðismálastofnunin WHO tekur þeim tíðindum varlega. Nýjasta hefti vísindaritsins Nature sem út kom í gær er helgað fuglaflensunni. Þar vara greinarhöfundar við að H5N1-veiran sé smám saman að taka breytingum og verða skæðari. Dæmi um það sé fundur 519 gæsahræja í Kína um síðustu helgi. Vísindamenn óttast helst að bráðum geti veiran smitast á milli manna og þá er voðinn vís. WHO gerir ráð fyrir að aðeins muni taka veiruna nokkra mánuði að breiðast út um heiminn og á þeim tíma verði að leggja þrjátíu milljónir manna á sjúkrahús. Af þeim muni 7,5 milljónir deyja. Albert Osterhaus, prófessor við Erasmus-stofnunina í læknavísindum í Rotterdam, segir í grein sinni í Nature að mat WHO "sé á meðal bjartsýnustu spáa um hver þróun faraldursins verður." Hann hvetur til að sett verði á fót sérstök aðgerðasveit færustu vísindamanna heims sem fái það verkefni að stilla saman strengi stjórnvalda víða um heim. Leiðarahöfundur Nature tekur í svipaðan streng og bendir á að ef faraldur hefst innan skamms verði ekki til nægt bóluefni í heiminum fyrr en eftir hálft ár eins og staðan er í dag. Þá er hins vegar orðið of seint að bólusetja. Því sé forgangsatriði að koma í veg fyrir að veikin nái að breiðast út með því að uppræta hana á meðan hún er enn að mestu bundin við fugla. Í gær lýstu Kínverjar því yfir að enginn hefði smitast af farfuglunum 519 sem fundust dauðir í Qinghai-héraði um helgina. Þá hermir Xinhua-fréttastofan að kínverskir vísindamenn hafi þróað bóluefni sem á að geta komið algjörlega í veg fyrir fuglaflensusmit í fuglum og spendýrum. Embættismenn hjá WHO taka fréttunum hins vegar með varúð og segja að efnið hafi að líkindum aðeins verið prófað á fuglum, ekki spendýrum. Því sé of snemmt að segja til um gagnsemi þess fyrir mannfólkið.